Bala Ramayanam in Saurashtrii

பா3ல ராமாயணம் - ஸௌராஷ்ட்ர மொழி

அவ்ரெ பா⁴ரத தே³ஸும் ஶ்ரீ வால்மீகி மென் மஹாருʼஷி ஹொத்³ய`ஸி தெனு ஶ்ரீ வைகுண்டநாது² ஒயெ மஹாவிஷ்ணு ஶ்ரீ ராமகன் ஔதார்லியெ சரித்ருʼ அத்பு⁴த காவ்யுகன் ரசி த்யெ லவ குஷ மெனன் தீ³ ந்ஹன்ன பா³ளுனுகு பூர்ணுகன் போ³த³னொ க⁴லாஸி . லவ குஷ மெனஸ்தெ பை⁴னு தீ³ஸு குலமு உஜ்யாஸ்தெனு, த³ஸரத² மஹாரஜாகு நத்யானு, த³ஸரது²க் பெ³டகன் ஔதார்லியெ ஶ்ரீ ராமசந்த்³ரு பெ³டானு . 

தீ³ஸு குலமுஜெ லவ குஷ பை⁴னு ஶ்ரீராம்மூர்தி ஸந்நிதா⁴னும் ஶ்ரீராம சரிது தும்பு³ர் வௌஜிலேது ஸிங்கா³ர்கன் கர்ணாம்ருʼதுகன் க³வ`ஸி . அபுல் பா³ப் ஜோளூஸ் தெக சரிது ஸங்க³`ஸி . த்யோஸ் ஶ்ரீமத்³ராமாயணு . லோகுர் கௌரின் ஹிம்ஸொ ஸஹன் ஸெக்கனாஜ்ஜியெஸ் மெனி த்யெ ஹிம்ஸொ கெஷ்டமுன் நிவர்தி கெரி த⁴ர்மஸ்தா³பனாகு தெ⁴ரி ஜீவராஸின் தே³வாதி³தே³வுன் நருன் பை²லாதின் நிம்மள் ஜிவன் தெ⁴ரி பு⁴லோகுர் ஔதார்லுனொ மெனி தே³வாதி³தே³வுன் ஶ்ரீமஹாவிஷ்ணுகு ப்ரார்த²னொ கெர`ஸி . நருன்கின் ஸுருன் மகி³லெதா⁴னுகு ஶ்ரீ மஹாவிஷ்ணு அயோத்⁴யாமு ஶ்ரீ த³ஸரத² மஹாராடுக் பெ³டொகன் ஔதார்லியாஸ் . த³ஸரது²கு தீ²ன் பா⁴ர்யான் கௌஸல்யொ, ஸுமித்ரொ, கைகேயி மென் திங்கொ நாவு . கௌஸல்யா போடும் ஶ்ரீராமொகின்,கைகேயி போடும் ப⁴ரதுகின்,ஸுமித்ரா போடும் லெக்ஷ்மணொகின் ஸத்ருʼக்⁴னொ மெனி சார் ந்ஹுருன் உஜ்யாஸி .  ஶ்ரீராம ஔதாருக் ஸஹாவ்கன் ர்ஹாத்த ஸொகன் ஶ்ரீ ஸுக்³ரீவு, ஆஞ்ஜனேயு, விபீ⁴ஷணு ஆதி³தெனு அனேக தா²முனும் உத்பத்தி ஹொயி ஜிவ்லி ஔயாஸ் .

ஶ்ரீ ராம்மூர்திகின் லக்ஷ்மணொ  தனுகின் சா²யா ஸொகொ செரி ஹொத³`ஸி . திஸோஸ் ப⁴ரதொகின் ஸத்ருʼக்⁴னொ ஸெங்கு³ ஸுட்டுனாஸ்தக் பூடும் பொடெ³ தாக் ஸொகன் ஒண்டேஸ்கன் ர்ஹியாஸி .  ஏ சரு பை⁴யின் அனேக கலானும் பாண்டி³த்யம் பொந்தி³ ந்ஹன்ன ஒர்ஸுமு நிபுணு ஹொயாஸி . ஒதி³ ஶ்ரீ விஸ்வாமித்ருʼ மஹருʼஷி த³ஸரத² ரஜொ ஜொவளவ`ஸி . அபுல் சல்வென் யாகு³கு  விக்⁴னுன் ஹோனாத்திஸொ ரக்ஷனொ கரஸ்தகு ஶ்ரீ தாம்மூர்திக்கின் லக்ஷ்மணாகு மொர் ஸெந்த த⁴ட்³டே³ மென் மகி³லியாஸீ . பா³ப் ஆக்³ஞொ ஸிரஶ் ஹோர் க²ள்ளி ஶ்ரீ விஸ்வாமித்ருʼ மஹருʼஷி ஸெந்த கெ³யெ ஶ்ரீ ராம லக்ஷ்மணானு தாடக, ஸுபாஹு ஆதி³ அங்கு³ன் அனேக ராக்ஷஸ கௌரினுகு வத⁴ம் கரி யாகு³ சொக்கட் விது⁴ம் பூர்தி ஹோஸ்தஹேது கர்யாஸி . ப²ராது ஶ்ரீ விஸ்வாமித்ருʼ ஶெர மிதி²லா நக³ரிகு ஜியாஸி . வாடும் தெ³கு³டொ³கன் பொடி³ ர்ஹியெ அஹல்யா ராம்மூர்தி லெங்கால் ஸாப விமோக்ஷு ஹொயிஸி . மிதி²லாகு கெ³யெ  வேளு ஜனக மஹாரஜொ ஶ்ரீலக்ஷ்மி அம்ஸு ஹொயெ ஸீதாதே³விகு ஹொராட் கெரஸ்த யத்தன் கெர்லி ர்ஹியெஸி . அபுல் ஜொவள் ஶேத்தெ ஶிவ த⁴னுஸ் கோன் மொடன்கீ தெகோஸ் ஸீதாகு ஹொராட் கெர் தொ²வஸ்தெ மெனி விதி³ க⁴லி ர்ஹியெஸி . ஶிவத⁴னும் மொடி ஜெயம் பொந்தி³ ஶ்ரீ ராமொ ஸீதாகு ஹொராட் கர்லியெஸி . ஸங்க³ன் ஜியெத் த்யெ முஹூர்துமுஸ் சரூ பை⁴னு ஹொராடுன் ஒண்டே லெக்³னும் சலெஸி . தேட் ர்ஹீ அயோத்⁴யாகு பி²ரி ஔலேத் ர்ஹத வாடும் ஶ்ரீ பரஸுராமுகு கெ³ருவ் ப⁴ங்க³ன கரி உத்க³டெ³ஸ் ராமொ .  அயோத்⁴யாக் அவி ஸொந்துகன் ஜிவ்லேத் ர்ஹத ஶ்ரீ த³ஸரத² ராடு ராம்மூர்திகு பட்டாபி⁴ஷேக் கெரி பொட்டம் ப⁴ந்த³ஸ்தகு ஹௌஸெஸ் . ருʼஷி ஸாபன ஹால்கின், பு²ள்ளொ த³ஸரது அபுலுகு தெ³வுஸ்மெனி ஹொதெ³ வருன் தி³யெதீஸ் ஹோய்மெனி கைகேயி அப்³ப³ள்ளித்தினொ ஹொயெ ஹாலு பட்டாபி⁴ஷேக் சலெனி . ராம்மூர்தி ராணுக் ஜாத்திஸொ ஹொயெஸி . தெக ஸெந்த லக்ஷ்மணொகின் ஸீதொ மெள்ளி ராணுக் நிகிளாஸி . கைகேயி ஆஸ்தொ மெள்ளி நிராஷொ ஹொயெஸி . தினொ ராம்மூர்தி சௌது³ ஒர்ஸுன் ராணுகு த⁴ட்³டீ³டி³ அபுல் பெ³டொ ப⁴ரதுகு ராஜ்ஜி பொட்டம் க²டி³ தே³ன் யத்தன் கர்லி ர்ஹீத்தெ .

பெ³டான் லெகு³த்தொ ர்ஹானாஸ்த ஸமயமு தூ தொர் ஜீவ் ஸொடை³யீ மெனி ஒண்டெ ருʼஷி த³ஸரது²க் ஸாபனொ தீ³ ஹொத்³யாஸ் . ராமொகின் லக்ஷ்மணொ ஆரண்ய வாஸுக் கெ³யெ ஸமயமு ப⁴ரதொகின் ஸத்ருʼக்⁴ணொ கேகயொ தே³ஸும் அபுல் அயின் கொ⁴ம்மொ ஹொத்³யாஸ் . ருʼஷி ஸொடெ³ ஸாபனொ தா⁴னுக் பெ³டானுக் ஸொட்³டி³ அலக்³க³ ர்ஹத த³ஸரத² ரஜொ தெ³வ்கெ³ஸி(ஜீவ் ஸொடெ³ஸி) .  ஸௌர குலமுஜெ ராமொ கு³ஹன் மெனஸ்தெ நௌகா சல்வுனாரு ஸஹாவ் லெந்த ஸரயு நெத்³தி³ த³டெஸ் . ஶ்ரீ ப³ரத்⁴வாஜ் ஆஸ்ரமாகு லந்தெ³ஸ் . அயோத்⁴யாகு பி²ரி அவெ ராம்மூர்தி பை⁴ ப⁴ரது பா³புகு கர்ன ஶேத்தெ கர்முனஸ்கி கரிமுஸட்டி அபுல் த³தொ³ ஹொயெ ராமாக் பி²ரி அயோத்⁴யாக் பொ³ல்லி அவுஸ் மெந்தி ப⁴ரதொ நிகிளெஸ் . பா³ப் ஸொர்கு³க் கெ³கெ³ விஷயம் களைலியெ ராமொ பா³புகு பெ³டொ கெர்ன ஶேத்திஸா காமுனஸ்கி கரெ ப²ல்ச ப⁴ரதாக் ஸமதா⁴னுன் ஸங்கி³ “பித்ரு வாகுக் மிஞ்செ மந்துர் ந்ஹீ” மெனி ஹட்வன் க⁴லெஸ் . ஹாலிமு ப⁴ரது ராமொ க⁴ல்லி ஶேத்தெ தீ³ பௌக³ள்னு மகி³ க²ள்ளி விடொ³ க²ள்யெஸ் .  ராம்மூர்தி தி³யெ ஆக்³ஞொ தொ³ஸ்கர் வஹிலி நந்தி³ மெனஸ்தெ பல்லமுக் ஜியெஸ் ப⁴ரதொ . ராமொ க⁴ள்ளி ஹொதெ³ பௌகளுன் சொக்கட் ஸொண்ணா ஸிம்ஹாஸனம் ஹோர் தொ²வி தெக ப்ரதிநிதி⁴கன் ராஜபரிபாலனொ சல்வெஸ் ப⁴ரத் . ஶ்ரீராம்மூர்தி ஸீதொ லக்ஷ்மண ஸகிதம் அனேக புண்ய நெத்³தி³னும் பு³டி³ பாவனஸ்த²னுன் த³ர்ஸன கர்லி பஞ்சவடிக் அவி லெந்தெ³ஸி . தேடுஸ் தெ²வ்ட³ தி³ன்னு ர்ஹாத்தகு நிஸ்சயு கர்லியெஸ் .  த்யே ஸமயம்மு லங்கா புரிம் ர்ஹவண் மெனன் கௌரி ராஜ்ஜி ஸௌனிலேத் ஹொதெ³ஸி . தெனொ கு³ண்ணும் ராக்ஷஸு ஜத பெ⁴ளி ஶ்ரேஷ்ட² ஶிவப⁴க்து . ஸாமவேத்³ இகெ³ ப⁴வண் ர்ஹவண் . தெனொ பூ⁴லோகும் அங்கு³ன் தே³வலோகும் ர்ஹியெத்தெங்கொ பா³தா³ன் து³ர்து³ன் தி³லேத் ஹொதெ³ஸி . தெக ஒண்டெ பெ⁴ய்னு திகொ ஸூர்பணகொ² மென் நாவு . தினொ யோக் தி³ன்னு ராம்மூர்திக் தெ³க்கிஸி . தெக ரூʼப லாவண்யு ஸீ மோஹித ஹொயினு தெக ப⁴ர்தகன் கர்லுனொ மெனி ஹட்வி கரெ கெரீஸ் . லக்ஷ்மண ஹாலி நாக் கடினி பொட³த்திஸா போ²ள் பொந்தி³ஸ் .  த்யே ராகுரு த³தொ³ ஹொயெ ர்ஹவண் ஜோளவி  ராம லக்ஷ்மணானுகு தெ⁴ரி  ந்ஹாத்தெ போ³லுன் ஸங்கி³ து³ர்லிஸ் . ம்ஹத்³தி³ம் ஸீதாகெ அங்க³லாவண்யுனு ஸிங்கா³ர் தெ⁴ரி பெ⁴ளி செ²டா³வ்கன் வர்ணனொ கெரீஸ் . த்யெ ஐகெ ர்ஹவண் மொன்னும் கோனக்தி ஸீதாகு ஹாதல்லுட்³னொ மெனி நஜ்ஜெ ஹட்வன் அபி⁴லாஷொ உஜெஸ் . தெக தெ⁴ரி மாரீசுகெ ஹேது வெக்கில்யெஸ் .  கௌரி மாரீசு ஹிரண்ஹரின் வேஷம் க⁴ல்லி ஸீதொ ஶேத்தெ வனமுக் அவி திக தொ³ளர் பொட³ஸ்திஸொ க²ளெஸ் . ஹிரண்ஹரினு மனோஹருன் தெ³க்கி ஸீதொ ராம்மூர்தி ஜொவள் த்யே ஹரினுக் தெ⁴ரி தெ³னொ மெனி மகி³லிஸ் . ராம்மூர்தி ஹரினுக் தெ⁴ரத்தகு தெ⁴ரி தெர்மிலி ஜு²கு தூ³ர் ஜேடி³யொ . மாரீசு த்யேஸ் சொக்கட் ஸமயம் மெனி கொதுகன் ராம்மூர்தி க⁴டி³ ஸொகன் அபுல் க⁴டி³ வவிலி, “ஹா, ஸீதா ! ஹா, லக்ஷ்மணா !” மெனி ப⁴வாட் தகெ³ஸ் .  தே க⁴டி³ ஸெத்³து³ ஐகெ ஸீதொ ர்ஹத்த தா⁴னுகு ராம்மூர்திக் கைகீ ஹீடவி லகி³ரஸ் மென் ஹட்வி தெ³வர் லக்ஷ்மணாக் பொ³வி துர் த³தா³க் ஜீ ஸீலி ஆவீ மெனி த⁴ட்³டி³ஸ் .  ஒண்டிக ர்ஹியெ ஸீதாகு ர்ஹவண் ப³ல்வந்துக³ புஷ்பக வீமானும் ஹிங்க³ள்ளி லங்காகு பொ³ல்ஜியேஸி . வாடும் ஜடாயு மெனன் பக்ஷிரஜொ இயெ ஸியெஸி . ர்ஹவண் ஸெர ஜெ²டொ³ மல்லி ஸீதாகு ப⁴ந்தி³ தொட³ன் ஸியெஸ் . ஹொயெத் அபுல் பிங்கு²ன் கடயி ஜீவுட்சயி கா²ல் பொடெ³ஸ் ஸீதொ அபுல் பூ⁴ஷணுனும் தெ²வ்ட³யொ ர்ஹவணுகு களனாஸ்திஸொ லங்காக் ஜாத்தெ வாடும் ஹெடி³ தகி³ஸ் . ஆஸ்ரமமுக் பி²ரி அவெ ராம்மூர்திகின் லக்ஷ்மணொ ஆஸ்ரமம்மு ஸீதொ தெ³க்கானாஜ்ஜியெ ஹால் பாஞின் ஜியெ போகும் திகொ வெக்கிலேத் ஜியாஸ் .  வாடும் பிங்கு²ன் முட்டி ஜீவுட்சயி பொடி³ ர்ஹியெ பக்ஷிராட் விவர்னு ஸங்கெ³ஸ் .  எக தெ⁴ரீஸ் ஜீவ் தெ⁴ர்லி ர்ஹியெ ஸொகொ  ப²ல்ல க்ஷணமுமுஸ் தெக ஜீவ் ஜியெஸ் . தெக அந்திம கர்மானஸ்கி கரி முஸட்டி அனேக ராக்ஷஸுனுக் வாடும் நாஸனகர்லேத் ஸப³ரிகெ ஆஸ்ரமாகு அவ்யாஸ் . ஸப³ரி கிராது ஜாது . தினொ ஒர்ஸு ஹொயெ பொள்ளா தொ³வ்ரி . தினொ ப்ரேவ்கன் தி³யெ பொள்ளான் கை²தி திகொ மெள்ளி மோக்ஷி தீ³டி³ அப்லான் வாடு பெய்னொ ஹொயாஸ் .  ருʼஷ்யமூகு³ மெனன் தொ³ங்க³ருர் ஶ்ரீ ஆஞ்ஜனேயுகு  தெகவாடுர் ஸுக்³ரீவுகு தெ³க்கி ஸிங்கை³த் கர்லியாஸ் . வாலிகின் ஸுக்³ரீவு த³தொ³ பை⁴ன் . தெங்காம் ஜெ²டொ³ ஹொய்லி ர்ஹியெஸ் . தெமொ ஶ்ரீராமொ ஸுக்³ரீவுக் ஸஹாவ் ர்ஹீ தெக ஹாலு வாலி மோக்ஷிகு வாட் ஹொயெஸ் . ஸுக்³ரீவு கிஷ்கிந்தா⁴கு ரஜொ ஹொயெஸ் .   ஆஞ்ஜனேயு வாடுமு அபுல் தெ³க்கி க²ள்ளியெ தெ²வ்ட³ பூ⁴ஷணான் ராம்மூர்தி ஜொவள் தெ³க்கடெ³ஸ் . தே ஸீதா பூ⁴ஷுண் . ராம்மூர்தி ஆஞ்ஜனேயு ஜோளு அபுல் அங்கி³ளின் க⁴ல்லி ஶேத்தெ முத்³தி³ ஹெடி³தீ³ ஸீதா ஶேத்தெ தா²ம் களைலி ஆவி மென் ஹுகெஸ் .   ஶ்ரீ ஆஞ்ஜனேயு கோன்யொ மெள்ளி ஸியெ மாத்ரமூஸ் த்யெ தெ⁴ரி ஸகலு ஜன்லஸ்திஸா பு³த்³தி⁴வான் . ஶ்ரேஷ்ட² வாக்த⁴னி . ஶ்ரீ ராமாகு தெனொ தெ³ய்வுகன் தெ³க்கெஸ் . தெகொ நாமமூஸ் தாரக மந்துர் கர்லியெஸ் . ஶ்ரீ ராம் ஜய ராம் ஜய ஜய ராம் மெனி ராம நாமம் மெல்லேத் ஸுந்து³ர் த³டெஸ் . லங்காகு லந்தெ³ஸ் . ஓகோகு தா²முனும் ஸுட்டுனாஸ்தகு பொ³ட்ட ஹோர் பீட் ஜெலிஞ்செ ஸொகொ கொம்மிம் வெக்கெஸ் . ஸெத்லாமு ஶ்ரீ ராம்செந்து³ர் ஹட்வனுமூஸ் ஹொதெ³ ஸீதாக் அஶோக வனமு தெ³க்கெஸ் . ஜா²ட்³ ஹோர் உஞ்ச பி³ஸில்லி ஶ்ரீராம வைப⁴வுன் ஸீதா கானும் பொட³ஸ்திஸ ஸங்கெ³ஸ் . தொ³ஸ்கொ உஞ்சள்ளி ஸீத ஸீஸி . ஜா²டு³ஞ்ச ர்ஹீ கா²ல் ஹுத்திரி அவி ஶ்ரீராமொ தி³யெ முத்³தி³ ஸீத ஜொவள் தீ³ அபுல் அவெ கரெ தெ⁴ரி ஸங்கெ³ஸ் . ராக்ஷஸ கௌரினும் மெள்ளி சொக்கட்³ கு³ண்ணுவந்துன் ர்ஹீஸ் ர்ஹான்கி ந்ஹா ?  ஸீதாகு ப⁴ந்தி³ ரக்ஷுவென் ர்ஹியெ கௌரிணிம் ஒண்டெனொ பெ⁴ளி சொக்கட்³ தினொ . த்ரிஜடொ மென்னாவு அபுல் தெ³க்கெ சொக்கட்³ ஸொப்னுன் தெ⁴ரி  ஸங்கி³ திகொ து³கு² நிவரிஸ் .    ஶ்ரீ ஆஞ்ஜனேயு அபுல் ஸீதாகு தெ⁴க்கி ஜங்கு தெ⁴ரி சூடா³மணி மெனன் ஶிரோரத்தன் க²ள்ளி லங்காதி⁴பாகு தெ³க்கன் ஹௌஸெல் அப்லானுகன் ஜானாத்தொ அபுலுகு ப⁴ந்தி³கர்லி ஜாத்திஸொ கர்லெஸ் . ர்ஹவணு த³ர்பா³ருகு ஜைலந்தி³ ஶ்ரீராம சந்த்³ரு யஶஸ், க³ரன் ஸ்ரேயஸ் தெ⁴ரி ஸங்கெ³ஸ் . தெக ஹாலி ராக் அன்லியெ ர்ஹவண் தெகொ பூஸ் ஹோர் வஸ்தர்னு கு³ண்வி ஹுளொ லவி ஸொட³த்தகு ஹுகெஸ் . த்யே ஹுளொ லவெயொ நுகி³லி ஆஞ்ஜனேயு தெகா ரவுளூஸ் ஹுளாம் பு³ட³டெ³ஸ் (ஜெளடெ³ஸ்). ப²ர ஸீதாமாயிகு த்⁴யான் கர்லிலேத் ஸொந்து³ருமு பூஸ் பி³ஜ்வி ஹுளொ ம்ஹௌளள்ளேஸ் . ஸுந்து³ர் லங்கி³ ஶ்ரீராமொ ஜோள்லந்தி³ “தெ³க்கெஸி ஸீதாகு” மெனி ஸங்கி³ அபுல் க²ள்ளி அவெ ஜங்கு ஶிரோரத்தன் தி³யெஸ் . ஸுக்³ரீவுகெ வானர பளானு ஸுந்து³ருகூஸ் அளப⁴ந்தி³ லங்கா கா³ம்மு துர்யாஸ் . அள ப⁴ந்த³த்தகு ந்ஹன்ன ந்ஹன்ன சிக்³லொ மெள்ளி ஸஹாவ் கெரெஸ் . த்யெ தெமாம் ஸொந்து ஹொய் ஶ்ரீராமொ த்யே சிக்³லாகு ஹாதுர்லீ பாட்சுரி தி³யெஸ் . ஹிந்தா³கு சிக்³லானு பாட் ஹோர் தீ²ன் அங்கி³ளின் சுரெ ஸொகன் ரேகொ² ஶேத்தெ தெ³க்குவாய் .    லங்கேஶ்புரு ர்ஹவணுகு கும்ப⁴கர்ணு, விபீ⁴ஷணு மெனி தீ³ பை⁴ன் . எமொ ர்ஹவணு மெனிகுன் ஜத து³ஸ்ர கொங்கினாஹாலு அபுலுகுஅந்து ஹோஹொனா மெனி ப்³ரஹம தே³வ் ஜொவள் வருன் க²ள்ர்ஹியெஸ் . மென்க்யான் ஹால் அபுலுக் ஹானி கெரன் முஸுனா மெனி ஹெம்மல் (கெ³ருவ்) தெகொ .   கும்ப⁴கர்ணுகு தே³வுனு ஸொகொ அபுலுமெள்ளி மொரன் ந்ஹீன்ஹாத்தெவரு பொந்து³ல்னொ மெனி ஆஸ்தொ . வருன் மகெ³வேள் தோண் கொ³ளயஸ் . நித்யத்வம் மெனன் கொ²ப்³பி³ம் ஜீவ வந்துகன் ர்ஹனி மக³த்தெ ஸொட்³டி³ நித்ரத்வம் சொக்கட்³ ஹோங்கு³ம் ர்ஹனி வருகன் அப்³ப³ள்ளெஸ் . ஹாலிமு கொ²ப்³பி³ம் நிஞ்ஜிர்ஹியெஸ் .   விபீ⁴ஷணு கொ²ப்³பி³ம் விஷ்ணு ப⁴க்திஸெர ர்ஹியெத்தெனொ . நேக் கு³ண்ணுன் சாலுன் ஶேத்தெனொ . ஹாலிமு கொ²ப்³பி³ம் ப⁴க்திமூஸ் பு³டி³ ர்ஹனொ தெ⁴ருமு வாட் மொன்னு சல்னொ மெனி வருன் க²ள்ளியெஸ் .   ராவணொ ஸீதாகு அபஹரனு கெர்லி அவெயொ தெகொ தீளித்கொ மெள்ளி ஸெர்க லகெ³னி . ஸீதாகு ராமொஜோளு லெஜ்ஜி தீ³டெ³ மெனி கித்கயீ விது⁴னும் ஹெடி³ ஸங்கெ³ஸி ராவணொ ஐகுனாஜ்ஜியெஹால் தெக்ப் ப³ந்து⁴த்வம் தொள்ளி ஶ்ரீராமொ ஜொவள் ஸரன் ஹொயெஸி . ஹாய் செரி ர்ஹனொ ஶேத்தெ தா²ம் களைலி செரி அஸ்கி சொக்கடு³ன் பொந்தெ³ஸ் .    லங்காமு ஶ்ரீராமாக்கின் ர்ஹவணுகு ம்ஹத்³தி³ம் பெ⁴ளி ம்ஹொடொ உக்⁴த ஜெ²டொ³ சலெஸி . ராவணு பை⁴ கும்ப⁴கர்ணு பெ³டொ இந்த்³ரஜித்து ஆதி³தெனு மொராஸி . ஸெத்லாமு ஶ்ரீராமசந்த்³ரு ஹதரொ ர்ஹவண் மெள்ளி தெ³வ்கெ³ஸி .  தெ³வ்கெ³ த³தா³கு கர்னஶேத்தெ அந்திம க்ரியானஸ்கி விபீ⁴ஷணு கரெஸ் . ஶ்ரீராமொ விபீ⁴ஷணுகு மகுடாபி⁴ஷேக் ஹொவடி³ லங்காதி⁴பொ கராஸ் .  ஶ்ரீ ஸீதொ மெள்ளி அக்³னி ப்ரவேஸ் ஹொயி அபுல் புனிதம் லோக் ஜனத்திஸொ கரி ஶ்ரீராமொஸெர செரிஸ் . புஷ்பக விமானும் ஸீதொ, லக்ஷ்மணொ, ஸுக்³ரீவ், விபீ⁴ஷணு அங்கு³ன் ஆஞ்ஜனேயு ஆதி³ன் தெங்க ஸெந்த வானர பளானுகு பொ³ல்லி ஶ்ரீராமொ அயோத்⁴யாகு நிகி³ளெஸ் .   ப⁴ரது சொவ்தூ³ ஒர்ஸுனும் ஶ்ரீ ராம்மூர்தி ஹட்வனு கோ³ஸீ ராஜ்ஜி ஸௌனிலேத் ஹொதெ³ஸ் . அங்கு³ன் ராம்மூர்தி தெ³க்கானினா மெனி து³ர்லத்தனகன் ஹுளொ பெட்வி த்யே அக்³னிகு சுட்டுபி²ரி தெமொ அபுலுகு பொ³லி தீ³லத்தகு தி⁴டவ் ஹொய்லெஸ் . ஆஞ்ஜனேயு பை²லாமு ஜீ ஶ்ரீ ராம்மூர்தி அவரிய விவர் களடி³ தெக ஸொம்பு ஸுந்து³ருமு பு³ட³டெ³ஸ் . ப⁴ரது ஶ்ரீ ராமாகு திரகவி நமி ப்ரேவுகு பொடளி ப⁴ந்தி³லி ஹௌஸெஸி . ப²ர சொக்கட் தி³ன்னுமு  சொக்கட் வேளுமு அனேக நெத்³தி³ தீர்துன் ஹால் ஶ்ரீராம்மூர்திகு அபி⁴ஷேக் கெரி பு³ட³டி³ அனேக ருʼஷி முனினு ப்ரஸன்னு ர்ஹத ஶ்ரீராம்மூர்திகு பட்டாபி⁴ஷேகு பெ⁴ளி விஸேஷ்கன் ஹொயெஸி . ரெத்தனு கசிது ஹொயெ பெ⁴ளி ஶ்ரேஷ்ட² ஸிம்மாஸனு ஹோர் ம்ஹத்³தி³ம் ஶ்ரீராம்மூர்தி பி³ஸி லெக்த ஸீதாக் பி³ஸள்ளி ஸக்ஷ்மணொ ஸதி தெ⁴ர்லுத, ப⁴ரது ஸத்ருʼக்⁴னொ சாமரு தகுத, வெது³ர் ஆஞ்ஜனேயு ஹாத்துக்கி பாதா³ர விந்த³முனு நம்லேத் ர்ஹத அனேக ருʼஷினு ரஜானு வைப⁴வு தொ³ள அரஸ்த தெ³க்கி ஆஸிதீ³ நமீ லோகுர் ர்ஹியெ ஸகல ஜீவராஸினு ஸகல மங்க³ளுன் பொந்தி³ ஸொந்து ஸெந்த ஜிவத்தகு ஶ்ரீ ராம்மூர்தி அணுக்³ரஹு கராஸ் .