Vikramaditya vetala Story in Sourashtrii

 

விக்ரமாதி3த்ய வேதாள  கெ2னி

மந்த்ரோபதே3ஸ் கெரெ கெ2னி

மொன்னு தி4ல்லொ ஸொண்ணாத்த ப்ரயத்தனும் ராட் விக்ரமாதி3த்யொ பீ2ர் மொஸ்யானுக் ஜியெஸ் வேதா3ளுக் தெ4ர்லியவஸ்தொ. தே ஹத்3து3ராதிம் மொஸ்யானும் மொடா3ண் ஜெள்ளேத் ஹொதெ3 காக்ஷி பூ4துன் ஜீப் லொம்ப3ஸொள்ளி நசரியொ ஸொகொ ஹொதெஸ். ஹித்3தி3 மெள்ளி தா4க் நீ:த்த விக்ரமாதி3த்யொ மொஸானும் ஹொட்3ரியொ ஸெவ்கா ஜா2ட்3 ஜொவள் லந்தெ3ஸ். தேட் தெனொ ஸியெ காக்ஷி பெ3து3ராத்திஸொ ஹொதெஸி.

ஸெவ்காஜா2ட்3 ஹோர் ஜு2கு மொடா3ண் லொம்பி3லேத் ஹொதெஸ். ஈ காய் ரா: ஜு2கு வேதா3ள் ஸொகன் லொம்ப3ரஸி. பஜெமெந்தி தமஸ்கெரத்தொ வேதா3ள் இஸொ கெர்ராய். எமாம் கோன மீ தெ4ர்லி ஜாத்தெ? ஹிந்த3 ராதி லோபுலாம் தெ4ரெ காம் முஸண்ணா ஜியெத் ஔமான் அவி லகை3னா. திஸொ ஔமான் அவெத் மொர் ஜீவ் ஸொட்3டு3 மெனி விக்ரமாதி3த்யொ மொன்னும் மெள்ளியெயொ ஜன்லியெ வேதா3ள்  க்ஷண கெ4டி3ம் அபுல் மாய ரூபுன் அஸ்கி ஜவள்ளி யோக்கன் லொம்பெ3ஸ். விக்ரமாதி3த்யொ வேதா3ளுக் தெ4ரி அபுல் கா2ந்து3ர் வஹிலி சலி ஜிலேத் ர:தொ  விக்ரமாதித்யனுக் ஸீ வேதா3ள்.  “ ஹோ, ராஜன்னு தொர் தி4டௌ ஹொயெ ப்ரயத்தன்னு பெ4ள்ளி ஆஸ்சர்யம் ஹொயெயொ. தெக ஹால் மீ ஸங்க3ன் கெ2னி தூ ஐக்கி” மெனி கொ2ப்3பி3ம் ஸொகன் கெ2னி ஸங்க3த்த ஹரும்ப3ம் கெரெஸ்.

ஸௌரத2ம் மெனஸ்தெ நக3ரிம் தே3வஸ்வாமி மெனன் ப4வண் ஸகல ஸாஸ்தருன் ஜனெத்தெனொகன் ஹொதெஸ். சொக் ஸூரி ஹொயெ தெகொ ரஜொ கெ4னம் கெர்லியவெஸ். இயெ ப4வணுக் யோக் பெ3டொ தெக நாவ் சந்த்3ரஸ்வாமி. எனொ ஜு2கு ஸாஸ்தருன் ஸிக்கில்ரெஸ் ஹொயெத் ஸூத் க2ளத்தெமம் பெ4ளி ப்ரேவ். ஒண்டெதி3 சந்த்3ரஸ்வாமி ஸூத் க2ளரியொ மொண்ட3வுக் ஜியெஸ். தேட் ஸூத் க2ளி ஹாதும் ஹொதெ ஸ்ரினஸ்கி அஸ்கி ஜவள்ளியெஸ். கேடும் பி2ர்லி ஹொதெ வஸ்தர் மெள்ளி ஸூத் க2ளி ஜவள்ளியெஸ். பீ2ர் ரீண் க2டி3 க2ளெஸ் தே மெள்ளி ஜவள்ளியெஸ். ரீண் தி3யெதெனொ ஹன்னௌ மகெ3ஸ் எக ஹால் தே3த்த முஸெனி. ப2ல்சொ ரீண் தி3யெத்தெனொ சந்த்3ரஸ்வாமிக் தெ4ரி ஸூது மொண்ட3வு கா2ம்பு3ம் ப4ந்தி3 ஹனெஸ். ஹனெ ஹன்னி ஸெக்கனாத்த தேடுஸ் மொடொ3 ஸொகொ மூஸள்லகி3 பொடெ3ஸ். இஸோஸ் தீ3தி3 தி3ன்னு ஜியெஸ். எனொ மொரெத்தெனொ ஸொக கா2ள்பொடி3 அம்கொ ஹொங்க3ட3த்த நிகிள்ரெஸ் மெனி ரீண் தி3யெத்தெனு மெள்ளியாஸ். ப2ல்சொ எனொ மூஸலகி3 ரா:த்தவேளுஸ் எகொ துக்கி ஹீரும் தகு3துவொ மெனி தேட் ஸேத்தெ காம் கெர்த்தான் ஜொவள் ஸங்கி3யாஸ். தெக ப2ராது காம் கெர்த்தான் எக துக்கிலி ஒண்டெ ராணும் ஜியேஸ் ஜாத்தவாடும் மொ:ட காம் கெர்த்தொ மெனெஸ் “ ரேய் எக விர்தாகு துகிலி ஜாத்தெ ஸொம்மர் ஏடுஸ் தைதி3 ஜேடி3யென் தேட் மொத்3ரளின் ஜொவள் ஜீ ஹீரும் தகி3தியா மெனி ஸங்கிதியென்” மெனி ஸங்கு3தொ அஸ்கின் ஸெர்கஸ் மென்யாஸ். மூஸலகி3 ஹொதெ சந்த்3ரஸ்வாமிக் தேடுஸ் ஒண்டெ தேட் தகி3தி அஸ்கின் நிகிளியாஸ். தெனு அஸ்கி ஜியெ ப2ராது மூஸலகி3 ஹொதெ சந்த்3ரஸ்வாமி ஹள்ளு ஹுடிபி3ஸெஸ். தேட் பெ4ள்ளி ஜீர்ணு ஹொயெ லிங்கு3 தௌ4ரொ ஸியெஸ். தே பி4த்தர் ஜீ லுக்கிலியெஸ்.

“ ஈஸ்வரா ! ஸூதும் ஜிகை3யாய் மெனி ஹவ்டெ3யொ இஸொ அஜீக்3 அப்3பி3டி3யொ நா ! எல்லெ ஸ்திதி2ம் மொகொ அவ்ரெ போ3 ஸியெத் தி4ல்லகன் ஹவ்ட3ன் நா ! மெனி மொன்னும் மென்லி தீ3ஸும் ஏடா2முஸ் ரீ:டி3யென் ராதிம் கா2த்தக் ஹொயெ க2னின் க2ள்ளியவஸ்தக் ப4ராட் ஜியென் மெனி மென்லி தேடுஸ் பி3ஸி ஹொதெஸ் சந்த்3ரஸ்வாமி.

தீ3ஸ்ஜீ ராதவெஸ். தெ2ப்3பொ3 ஒண்டெ ஸன்யாஸி ருத்3ரு ஸொகொ ரூபும் தெல்லெ ஜீர்ணு ஹொயெ லிங்கு3 தௌ4ராக் அவ்யாஸ். தேட் லுக்கிலி ஹொதெ சந்த்3ரஸ்வாமிக் ஸெய்கின் கோன் பா3 தூ ? மெனி புஸ்யாஸ். தெகொ சந்த்3ரஸ்வாமி சலெ கெ2னியஸ்கி ஸங்கெ3ஸ்.

த்யெ ஐக்கெ ஸன்யாஸி “ தூ பூ4க் ஸெந்தொ மொர் ஆஸ்ரம்முக் ஔரஸ். தேல தெல்லெ கௌ2ரிம் ஜீ ஸ்னான் கெர்த்தி ஆவ். மீ பீ4மகி3 க2ள்ளியவ்ரியொ  க2னினும் ஒண்டெ வடொ கை2தி ஸாந்தி கெர்லெ மெனி ஸன்யாஸி ஸங்கு3தொ.  தெல்லெகொ சந்த்3ரஸ்வாமி, “ க்ஷமொ கெர்லுனொ ஸ்வாமினு ! மீ ஒண்டெ ப4வண். துமி பீ4மகி3லி க2ள்ளி அவெயொ மீ கா2த்தெ ஸெர்கொ நா: மெனி ஸங்கெ3ஸ். க்ஷண கெ4டி3ம் ஸன்யாஸி அபுல் பர்ணஸாலாமவி  அபுல் ஸிக்கெ மந்த்ர வித்3யாம் தே3வதானுக் பொ3வெஸ்.தே3வதான் ஸன்யாஸிக் காக்ஷிதீ3 காய் பஜெ மெனி புஸ்யாஸ்.  தே3வதானுக் ஸெய், மொர் ஆஸ்ரம்முக் அவ்ரிய ஏ பொ2வ்னாக் உபசார் கெர்னொ மெனி உத்தர் ஸங்கி3யாஸ். த்தாஸ்து மெனி  தே3வதான் மெந்தி தேட் ஒண்டெ ரம்யம் ஹொயெ  ஸொன்னா கா3ம் நிர்மான் ஹொயெஸ். தேட் விதவித பூ2லு வனுன் ஹொதெஸ். தே3வதான் சந்த்3ரஸ்வாமி லெக்தவினு ஸ்வாமினு ! துமி அவி பா4த் ஜொம்தியவி ஸ்ரமபரிகார் கெர்லுவொ. மெனி மெல்லியாஸ்.  சந்த்3ரச்வாமிக் பி3த்தர் பொ3ல்லியவி ஸ்னான் கெரடி3 நொவ்வ பே2லுன் பி2ரடி3 கா2த்தக் பொ3ல்ஜியஸ். தேட் அக்ரபதிகன் ஹொதெ ஒண்டெ தே3வஸ்திரி சந்த்3ரஸ்வாமிக் சொக்கட் தா4னு உபசார் கெரிஸ். தே3வாமிர்த3ம் ஸொகன் அன்னுன் ஜொமெஸ்.

ராத்ஜீ ஸொளொ ஹொயெஸ். ஹோங்கு3ம் ரீ: ஹுடி ஸியெஸ் சந்த்3ரஸ்வாமி தெக லெக்த ஜீர்ணு ஹொயெ லிங்கு3 தௌ4ரொ ஹொதெஸ்.

சந்த்3ரஸ்வாமிக் ஸெய் “காய் பா3 ராத் தி3ன்னு ஸொந்தோஷ்கன் ஜியஸ் ஹா ? மெனி ஸன்யாஸி புஸ்யாஸ்.

தும்ரெ த3யொ ஹால்  சொக்கட் ஸொந்தோஷ்கன் ஜியெஸ். ஹொயெதி, ராதி ஸியெ தெல்லெ தே3வஸ்திரி நீ:த்த மொர்ஹால் ஜீவ் ஸெந்த ரா:த்த முஸுனா மெனி மெனெஸ்.

தெல்லெகொ, த3யா கு3ணம் ஸேத்தெ எல்லெ ஸன்யாஸி “ மெய்காய் பா3 தூ ஏடுஸ் ரீ:டெ3 ஸொந்தோஷ்கன் ர:வ்வாய்” மெனி மெந்த. இஸோஸ் ஸுக2ம் அனுப4விஞ்சிலி அவெஸ் சந்த்3ரஸ்வாமி.

ஒண்டெதி3 ஸந்த்3ரஸ்வாமிகு சலரியொ அஸ்கி மர்மம்கன் லகெ3ஸ். ஸன்யாஸி மந்த்ர ஸக்தி ஹாலுஸ் எல்லெ அஸ்கி கெரத்த முஸரியொ மெனி ஜன்லியெஸ்.

ஒண்டெதி3 சந்த்3ரஸ்வாமி, ஸன்யாஸி ஜொவள் அவி “ஸ்வாமி மொகொ துமிஸ் க3தி. மொர் ஹோர் த3யொ தொ2வி எல்லெ மந்த்ர விக்ஞான ரஹஸ்யமுன் உபதே3ஸ் கெரொ மெனி மெல்லியெஸ்.

தெல்லெகொ ஸன்யாஸி. அரே பா3 ! தொகொ எல்லெ வித்3யொ அஸ்கி லெகு4வ்கன் ஸித்3தி4 ஹோனா. பனிம் ரீ: எல்லெ மொந்துருன் உச்சாடனொ கெர்னொ. திஸொ கெரத்தவேள்  ஸித்3தி4க் விக்3னம் கெரத்த அனேக ஸேத4னான் அவை பா3 ! எல்லெ மாயாஜால் அஸ்கி த3ண்டிகின் அவ்னொ பா3 ! ஹுளொ பி4த்தர் துரி ஔனொ பா3 ! எமாம் ரீ: தூ மு:ரி ஸேரு பொரொ கெரெத் மெள்ளி தொகொ ஸித்3தி4 அப்3பு3னா ! தொகொ கு3ருகன் ஸேத்தெ மொகொ மெள்ளி ஸக்தி ஜேடை3 தெக ஹாலி எல்லெ விஷபரீக்ஷொ நொக்கொ ! தொகொ பஜெ ஹோரியொ ஸொந்தோஷ் மொர் வித்3யொ லெங்காலுஸ் தூ அனுப4விஞ்சிலி ஆவ் பா3 மெனி ஸன்யாஸி ஸங்கு3தொ. சந்த்3ரஸ்வாமி ஐகெனி ! ஸன்யாஸி ஜொவள் மெனெயோஸ் மெனி ஜீவ் ஹெடெ3ஸ் ! என கெர்ரியொ ஹிம்ஸ ஸெக்குனாத்த ஸன்யாஸி மந்த்ர உபதே3ஸ் கெர்யாஸ்.  நெத்3தி3ம் ஹிப்3பி3 மந்துர் உச்சாட3ன கெரத்த ஹரும்பம் கெரெஸ் சந்த்3ரஸ்வாமி. திஸொ உச்சாட3னொ கெரத்தவேள் விக்3னமுன் அவெஸ் தெமாம் ஸம்டி மொந்துர் பொரொ கெரெஸ். ப2ல்சொ ஸன்யாஸி ஜொவள் அவினு, கு3ருனு மீ கை பொரொ கெர்ரெனி ஹொயெத் மந்த்ர ஸித்3தி4 ஹொயெனி மெனி மெந்த.. ஸன்யாஸி பரீக்ஷொ கெரி ஸியென் மெனி மொந்துர் மெந்த தெக ஹொதெ3 ஸக்தி அஸ்கி ஜேடி3ரஸ் மெனி ஜன்லியெஸ் . தீ3 தெனு மந்த்ர வித்3யொ ஜவள்ளிடி3யா.

 

இஸொ கெனி ஸங்கி3லேத் அவெ வேதாள், விக்ரமாதி3த்தனுக் ஸெய் “ ஹே, விக்ரமாதி3த்யா  ஸெர்க தா4னு மந்த்ர உச்சட3னொ கெரெ சந்த்3ரஸ்வாமிக் க்கொ ஸித்3தி4 அப்3பெ3யொ நீ: ? கு3ருகன் ஹொதெ ஸன்யாஸிக் க்கொ ஸக்தி ஜியெயொ ? மெனி புஸ்தொ.

க்ஷண கெ4டி3ம் ஜெவாப் கெரெஸ் விக்ரம்.

“லக்ஷ்யம்,ஒகத்,ஸிரத்3தொ3,தா3ன் எமாம் கோனெ ஹொயெத் காய் ஏக மொன்னுகன் கெரெதீஸ் போ2ள் அப்3பை3. ஒஜனொ கோன் கார்யமுன் கிரமொ தா4னு கெரெத்காய் மெள்ளி, தெனொ ஏக மொன்னுகன் ஸ்தி2ரம்கன், தெ4ய்ரியம்கன் சல்த கெர்ன ஜியெத் கொம்மிம் ஸித்3தி3 அப்3பு3னா. கு3ரு ஜொவள் உபதே3ஸ் க2ள்ளியெத் மெள்ளி ஸிஷ்யாக்  மனக் கிலேஷம்கின் ஸொம்ஸெ ஔடி3யொ. தெக ஹாலுஸ் தெக ஸித்3தி4 அப்3பி3ரியொ நீ:. யோக்3யதொ நீ:த்தெ ஸிஷ்யாக் மந்த்ர உபதே3ஸ் கெரெ காரண ஹாலி கு3ருக் அபுல் ஸக்தி ஜீரியொ” மெனி விக்ரமாதி3த்யொ மெந்தொ…

ஸெர்கொ ஹொயெ ஜெவாப் ஸங்கி3தியொ மெந்தி பீ2ர் வேதாள் ஸெவ்கா ஜா2டு3ம் ஹிங்கி3ள்டி3யொ..

அனுவாத்

கொண்டா K.S.செந்தில்குமார் மதுரை 9865319299