Ramayana bindhu

ꢬꢵꢪꢵꢫꢠ ꢨꢶꢥ꣄ꢣꢸ ꢧꣀꢭꢩꢵꢔ꣄

ꢃꢬ꣄ꢫꢮꢬ꣄ꢣꢪꢸ ꢔꢾꢖ꣄ꢔꢵ ꢥꢾꢣ꣄ꢣꢶꢒ꣄ ꢆꢡ꣄ꢡꢬ꣄ ꢣꢶꢒ꣄ꢒꢸꢪ꣄ ꢯꢿꢡ꣄ꢡꢾ ꢒꣂꢱꢭꣀ ꢪꢾꢥꢥ꣄ ꢣꢿꢱ꣄ ꣎ ꢡꢿ ꢣꢿꢱꢸꢒ꣄ ꢬꢵꢙ꣄ꢫꢱ꣄ꢡꢵꢥꢶ ꢂꢫꣂꢤ꣄ꢫꢵ ꣎ ꢡꢿꢜ꣄ ꢣꢱꢬꢡꢥ꣄ ꢪꢾꢥꢥ꣄ ꢬꢵꢜ꣄ ꢩꣁꢮꢾꢒꢵꢭꢪ꣄ ꢡꣁꢒꢥ꣄ ꢬꢵꢙ꣄ꢙꢳ꣄ꢳꢶ ꢂꢮꢾꢱ꣄ ꣎ ꢡꢾꢥꣁ ꢤꢬꢸꢪꢮꢵꢥ꣄ ꢲꢷꢥꢸꢥꢸꢒ꣄ ꢮꣀꢬꢶꢒꢥ꣄ ꢱꢾꢡ꣄ꢡꢸꢪ꣄ ꢱꣁꢪ꣄ꢪꢸꢒꢥ꣄  ꢗꣁꢒ꣄ꢒꢜ꣄ ꢤꢾꢬꢸꢪ꣄ ꢒꢾꢬ꣄ꢭꢶ ꢲꣁꢥ꣄ꢣꢾꢱ꣄ ꣎

ꢣꢱꢬꢡ ꢬꢵꢜꢸꢒꢸ ꢢꢷꢥ꣄ ꢱꢡꢶꢥ꣄  ꢒꣃꢱꢭ꣄ꢫꢵ ꢒꣀꢒꢿꢫꢶ ꢯꢸꢪꢶꢡ꣄ꢬꢵ ꣎  ꢄꢥꢸ ꢢꢷꢥ꣄ ꢡꢾꢥꢸꢥ꣄  ꢣꢸꢱꢣꢸꢱ ꢣꢿꢱꢸ ꢬꢵꢙ꣄ꢫꢒꢸꢪꢵꢬꢶꢥ꣄ ꢒꢥ꣄ ꢬꢴꢶꢫꢾꢡ꣄ꢒꢵꢫ꣄ ꢪꢾꢳ꣄ꢳꢶ  ꢏꢠ꣄ꢜꢾ ꢪꢵꢫ꣄ ꢦꣂꢜꢸꢪ꣄ ꢆꢙꢾ ꢥꢴꢸꢬꢸꢥ꣄ ꢱꣁꢒꢥ꣄ ꢏꢙꢥꢵꢒ꣄ ꢏꢙꢥꢵꢥ꣄  ꢦ꣄ꢬꢿꢮ꣄ꢒꢥ꣄ ꢬꢴꢷꢭꢶ ꢂꢦꢸꢭ꣄ ꢦꢡꢶꢒ꣄ ꢗꣁꢒ꣄ꢒꢜ꣄ ꢤꢵꢥꢸ ꢔꣃꢛ꣄ꢗꢶꢭꢶ ꢂꢮ꣄ꢫꢵꢱ꣄ ꣎ ꢌꢖ꣄ꢒ ꢢꢷꢥ꣄ ꢡꢾꢪꢵꢪ꣄ ꢪꢲꢵꢬꢵꢠꢶ ꢒꣃꢱꢭ꣄ꢫꢵꢒ꣄  ꢱꢵꢥ꣄ꢡꣀ ꢪꢾꢥꢥ꣄ ꢨꢾꢜ꣄ꢒꢶ ꢥꢴꢸꢬꢸ ꢆꢙꢾꢱꢶ ꣎  ꢥꢴꢸꢬꢸꢨꢵꢳ꣄ ꢥꢴꢷꢡ꣄ꢡ ꢆꢭꣂꢪꢦꢵꢣ ꢪꣃꢥꢶ ꢱꢵꢥ꣄ꢡꣀ ꢪꢾꢥꢥ꣄ ꢥꢴꢸꢬꢸ  ꢪꣁꢬ꣄ ꢙꣁꢮꢳ꣄ ꢦꣁꢱꢸꢥꢵꢒ꣄ ꢣꢷꢞꢸꢮꣂ ꢪꢾꢥ꣄ ꢣꢱꢬꢡꢬꢙꣁ ꢙꣁꢮꢳ꣄ ꢪꢾꢭ꣄ꢭꢸꢡ  ꢪꣃꢥꢶ ꢪꢾꢭ꣄ꢭꢶꢫ ꢲꣂꢬꢸꢪ꣄ ꢡꢿ ꢨꢾꢜ꣄ꢒꢶ ꢥꢴꢸꢬꢸ ꢪꣃꢥꢶ ꢙꣁꢮꢳ꣄ ꢦꣁꢱꢸꢥꢵꢒ꣄ ꢣꢶꢫꢾꢱ꣄ ꢬꢵꢜ꣄ ꣎  ꢆꢭꣂꢪꢦꢵꢣ ꢪꣃꢥꢶ ꢡꢿ ꢥꢴꢸꢬꢸ ꢪꢴꣁꢜ ꢲꣁꢞꢾ ꢧꢭ꣄ꢗꣁ ꢒꢭꣀꢒ꣄ꢒꣂꢜ꣄ꢜꢸ ꢪꢲꢵ ꢪꣃꢥꢶꢒ꣄ ꢲꣁꢬꢵꢜ꣄ ꢒꢾꢬꢶ ꢣꢶꢫꢾꢱꢶ ꣎

ꢡꢿ ꢪꢴꢣ꣄ꢣꢶꢪ꣄ ꢣꢱꢬꢡ ꢬꢵꢜ꣄ ꢥꢴꢸꢬꢸ ꢧꣂꢳ꣄ ꢦꢙꢾ ꢪꢾꢥ꣄ꢡꢶ ꢦꢸꢡ꣄ꢬ ꢒꢵꢪꢿꢰ꣄ꢜꢶ ꢫꢵꢔꢪ꣄ ꢒꢾꢬꢾꢱ꣄ ꢡꢾꢒ ꢧꢭꢥ꣄ꢒꢥ꣄  ꢒꣃꢱꢭ꣄ꢫꢵꢒ꣄ ꢬꢵꢪꢥ꣄ ꢪꢾꢥꢥ꣄ ꢥꢴꢸꢬꢸ ꢆꢙꢾꢱ꣄ ꢒꣀꢒꢿꢫꢶꢒ꣄ ꢩꢬꢡꢥ꣄ ꢪꢾꢥꢥ꣄ ꢥꢴꢸꢬꢸ ꢆꢙꢾꢱ꣄ ꢱꢸꢪꢶꢡ꣄ꢬꢵꢒ꣄ ꢭꢒ꣄ꢰ꣄ꢪꢠꣁ ꢗꢡꢺꢒꢥꣁ ꢪꢾꢥꢥ꣄ ꢥꢴꢸꢬꢸ ꢂꢨ꣄ꢨꢾꢱ꣄ ꣎

ꢗꢬꢹ ꢥꢴꢸꢬꢸꢥ꣄ ꢗꣁꢒ꣄ꢒꢜ꣄ ꢤꢵꢥꢸ ꢲꣁꢞꢶ ꢂꢮ꣄ꢫꢵꢱ꣄ ꣎  ꢥꢴꢸꢬꢸꢥ꣄ ꢪꢴꣁꢜ ꢲꣁꢞꢾ ꢧꢱ꣄ꢗꣁ ꢣꢱꢬꢡ ꢗꢬꢹ ꢥꢴꢸꢬꢸꢥꢸꢒ꣄  ꢒꢸꢭꢔꢸꢬꢸ ꢲꣁꢫꢾ ꢮꢯꢶꢰ꣄ꢜ ꢪꣃꢥꢶ ꢲꣂꢬ꣄ ꢂꢖ꣄ꢔꢸꢥ꣄ ꢣꢸꢱꢣꢸꢱ ꢃꢗ꣄ꢗꢵꢬ꣄ꢫꢸꢥꢸ ꢲꣂꢬꢸꢪ꣄ ꢯ꣄ꢬꢸꢡꢶ ꢱ꣄ꢪꢺꢡꢶ ꢧꣀꢭꢵꢡꢶ ꢯꢵꢱ꣄ꢡꢬꢸꢥ꣄ ꢤꢥꢸꢬ꣄ ꢮꢶꢣ꣄ꢫꣁ ꢧꣀꢭꢵꢡꢶ ꢮꢶꢣ꣄ꢫꢵꢥ꣄ ꢲꣀꢱ꣄ꢡꢸ ꢲꢶꢖ꣄ꢔꢡ꣄ꢡꢾ ꢕꣁꢞꣁ ꢲꢶꢖ꣄ꢔꢡ꣄ꢡꢾ ꢧꣀꢭꢵꢡꢶ ꢮꢶꢣ꣄ꢫꢵꢥꢱ꣄ꢒꢶ ꢱꢶꢒ꣄ꢒꢞ꣄ꢫꢵꢱ꣄ ꣎  ꢪꢵꢫ꣄ ꢨꢵꢦꢸꢥ꣄ ꢔꢸꢬꢸꢮꢸꢥꢱ꣄ꢒꢶ ꢨꢾꢣꢸꢬꢡ꣄ꢡꢶꢱ ꢂꢱ꣄ꢒꢶ ꢮꢶꢣ꣄ꢫꢵꢥꢸꢪ꣄ ꢦꢬꢷꢒ꣄ꢰꢫꢪ꣄ ꢲꣁꢫꢵꢱ꣄ ꣎ ꢄꢱꢒꢥ꣄ ꢢꢾꢮ꣄ꢞ ꢏꢬ꣄ꢱꢸ ꢔꢪ꣄ꢜ꣄ꢫꢵꢱ꣄ ꣎

ꢏꢠ꣄ꢜꢾꢣꢶ ꢬꢵꢜ꣄ ꢬꢵꢙꢵꢖ꣄ꢔ ꢱꢩꢵꢪ꣄ ꢬꢴꢡꣁ  ꢮꢶꢱ꣄ꢮꢵꢪꢶꢡ꣄ꢬ ꢪꢲꢵ ꢈꢰꢶ ꢂꢮ꣄ꢫꢵꢱ꣄  ꢬꢙꢵꢒ꣄ ꢱꢾꢫ꣄ ꢪꢷ ꢏꢠ꣄ꢜꢾ ꢫꢵꢔꢪ꣄ ꢒꢾꢬꢡ꣄ꢡꢒ꣄ ꢥꢶꢔꢶꢳꢾꢱ꣄ ꢡꢿ ꢫꢵꢔꢪ꣄ ꢮꢶꢔ꣄ꢥꢪ꣄ ꢒꢾꢬꢱ꣄ꢡ꣄ꢡꢒ꣄  ꢮꢶꢥ꣄ꢣ꣄ꢫꢔꢶꢬꢶꢒ꣄ ꢣꢾꢒ꣄ꢰꢠꢸꢪ꣄ ꢙꢶꢮꢥ꣄ ꢒꢳꢙꢵꢡ꣄ ꢪꢾꢥ꣄ꢒ꣄ꢫꢵꢥ꣄ ꢂꢞ꣄ꢞꢪ꣄ ꢂꢮꢬꢵꢱ꣄ ꣎ ꢂꢖ꣄ꢔꢸꢥ꣄ ꢂꢥꢿꢒ ꢡꢾꢥꢸꢥ꣄ ꢂꢮꢶ ꢮꢶꢔ꣄ꢥꢪ꣄ ꢒꢾꢬꢬꢵꢱꢶ ꣎ ꢪꢷ ꢮꢶꢔ꣄ꢥꢪ꣄ ꢥꢴꢷꢡ꣄ꢡ ꢫꢵꢔꢪ꣄ ꢒꢾꢬꢡ꣄ꢡꢒ꣄ ꢣꢱꢬꢡ ꢬꢵꢜꢸꢥ꣄ ꢲꢿꢡꢸ ꢒꢾꢬ꣄ꢥꣁ ꢡꢸꢬꢾ ꢨꢾꢜ ꢬꢵꢪꢵꢒ꣄ ꢪꣁꢬ꣄ ꢱꢾꢥ꣄ꢡ ꢤꢞ꣄ꢞꢸꢮꣁ ꢪꢾꢥ꣄ ꢪꢾꢭ꣄ꢭꢶꢫꢾꢱ꣄ ꢈꢰꢶ ꣎ ꢌꢭ꣄ꢭꢾ ꢎꢒ꣄ꢒꢾ ꢬꢵꢜ꣄ ꢈꢰꢶꢥ꣄ꢮꣂ ꢡꢸꢬꢾ ꢫꢵꢔꢪ꣄ ꢮꢶꢔ꣄ꢥꢪ꣄ ꢥꢴꢷꢡ꣄ꢡ ꢦꢹꢬ꣄ꢠꢸ ꢲꣂꢡ꣄ꢡꢒ꣄ ꢪꢷ ꢂꢮꢶ ꢱꢾꢫ꣄ꢭꢸꢱ꣄ ꢪꢷ ꢂꢮꢸꢱ꣄ ꢪꢾꢥꢶ ꢪꢾꢥꢾꢱ꣄ ꣎ ꢌꢭ꣄ꢭꢾ ꢎꢒ꣄ꢒꢾ ꢮꢶꢱ꣄ꢮꢵꢪꢶꢡ꣄ꢬ  ꢣꢱꢬꢡꢵ  ꢍ ꢥꢴꢥ꣄ꢥ ꢒꢵꢪꢸꢒ꣄ ꢡꢹ ꢡꣁꢬ꣄ ꢒꢵꢪ꣄ ꢱꣁꢞ꣄ꢞꢶ ꢒꣁꢔꣁ ꢂꢮꢱ꣄ ꢬꢵꢪꢵꢒ꣄ ꢤꢞ꣄ꢞꢾ ꢧꢸꢬ꣄ꢙꢵꢫ꣄ ꣎ ꢬꢙꣁ ꢈꢰꢶꢒ꣄ ꢱꢾꢫ꣄ ꢱ꣄ꢮꢵꢪꢶ ꢬꢵꢪ ꢥꢴꢥ꣄ꢥ ꢥꢴꢸꢬꢸ ꢡꢿ ꢭꢾꢖ꣄ꢒꢵꢭ꣄ ꢌꢭ꣄ꢭꢾ ꢒꢵꢪ꣄ ꢒꢾꢬꢥ꣄ ꢲꣂꢥꢵ ꢪꢷ ꢂꢮꢶ ꢒꢾꢬꢶ ꢣꢾꢮꢸꢱ꣄ ꣎ ꢡꢹ ꢑꢥꣁꢪꢾꢥ꣄ ꢂꢮꢱ꣄ꢫꢪ꣄ ꢥꢴꢷ ꢡꢹ ꢬꢵꢪꢵꢒ꣄ ꢤꢞ꣄ꢞꢾ ꢪꢾꢥꢶ ꢈꢰꢶ ꢪꢾꢥ꣄ꢡ ꢬꢵꢪꢵꢒ꣄ ꢱꣁꢞꢶ ꢣꢿꢡ꣄ꢡꢒ꣄  ꢪꣁꢥ꣄ꢥꢸ ꢥꢴꢷ ꢣꢱꢬꢡꢵꢒ꣄ ꢪꢾꢥ꣄ ꢙꢥ꣄ꢭꢶꢫꢾ ꢈꢰꢶ ꢮꢱꢶꢰ꣄ꢝꢬ꣄ ꢬꢙꢒ꣄ ꢱꢾꢫ꣄ ꢬꢙꢵꢥ꣄ꢮꣂ ꢡꢹ ꢡꣁꢬ꣄ ꢨꢾꢜꢵꢒ꣄ ꢮꢶꢱ꣄ꢮꢵꢪꢶꢡ꣄ꢬ ꢱꢾꢥ꣄ꢡ ꢤꢵꢒ꣄ ꢥꢴꢷꢡ꣄ꢡ ꢤꢞ꣄ꢞꢾ ꣎ ꢬꢵꢪꢵꢒ꣄ ꢒꣀ ꢲꢷꢥ꣄ ꢲꣂꢥꢵ ꢬꢵꢪꢵꢒ꣄ ꢮꢶꢱ꣄ꢮꢵꢪꢶꢡ꣄ꢬꢬ꣄ꢥꢸ ꢱꢾꢫ꣄ꢭꢥ꣄ ꢡꢿ ꢥꢴꢵꢡ꣄ꢡ ꢂꢥꢿꢒ ꢮꢶꢣ꣄ꢫꢵꢥ꣄ ꢄꢔꢞꢥ꣄ ꢍ ꢭꢾꢖ꣄ꢒꢵꢭ꣄ ꢬꢵꢪꢵꢒꢹꢱ꣄ ꢗꣁꢒ꣄ꢒꢜ꣄ ꣎ ꢂꢡ꣄ꢡ ꢌꢥꢸ ꢪꢔꢸꢭꢬꢶꢫ ꢡꢹ ꢤꢞ꣄ꢞꢸꢥꢵ ꢙꢶꢫꢾꢡ꣄ ꢡꣁꢒ ꢒꢶꢥ꣄ ꢡꣁꢬ꣄ ꢬꢵꢙ꣄ꢙꢶꢫꢪꢸꢒ꣄ ꢂꢖ꣄ꢔꢸꢥ꣄ ꢬꢵꢪꢵꢒ꣄ ꢲꢷꢥꢸꢥ꣄ ꢂꢮꢶ ꢭꢔꢫ꣄ ꢍ ꢥꢶꢗ꣄ꢗꢫꢪ꣄ ꢪꢾꢥꢶ ꢨꢸꢣ꣄ꢤꢶ ꢱꢖ꣄ꢔꢾꢱ꣄ ꣎ ꢡ꣄ꢫꢾ ꢕꢾꢞꢶꢪ꣄ ꢬꢵꢪꢵꢒ꣄ ꢨꣁꢭ꣄ꢭꢶ ꢙꢮꣂ ꢪꢾꢥꢶ ꢈꢰꢶ ꢱꢾꢥ꣄ꢡ ꢤꢞ꣄ꢞꢶꢫꢿꢱ꣄ ꣎ ꢣꢣꣁ ꢬꢵꢪ ꢱꢾꢥ꣄ꢡ ꢪꢷ ꢪꢾꢳ꣄ꢳꢶ ꢙꢮꢸꢱ꣄ ꢪꢾꢥꢶ ꢭꢾꢒ꣄ꢰ꣄ꢪꢠꣁ ꢥꢶꢔꢶꢳꢾꢱ꣄ ꢮꢾꢫ꣄ ꢙꢷꢭꢶ ꢃꢮ꣄ꢨꢵ ꢪꢾꢥ꣄ ꢤꢞ꣄ꢞꢶꢫꢾꢱ꣄ ꢬꢵꢜ꣄ ꣎ ꢬꢵꢪ ꢭꢒ꣄ꢰ꣄ꢪꢠꣁ ꢪꢵꢫ꣄ ꢨꢵꢦꢸꢥ꣄ ꢙꣁꢮꢳ꣄ ꢦꢸꢱꢶꢳꢶ ꢮꢶꢱ꣄ꢮꢵꢪꢶꢡ꣄ꢬ ꢪꣃꢥꢶ ꢱꢾꢥ꣄ꢡ ꢙꢶꢫꢵꢱ꣄ ꣎

**********************************************