kaliyuga dherum

kaliyuga dherum

paatrun : saadhu, raaT, saadhu siShyo.

chevdestteno mhuDo kii? chevdunaastteno mhuDo ? rhatta mhuDo kOn kaliyuka dherum kayo meni janlastta ee nhan kheni hEtukan rhaay.

shubha dinnum oNTe dinnu. oNTe dEsu raaTuk dekkastta oNTe saadhu avyaas. dEsunuk raaTkan shEttenu saadhun sange dhaanuk jivno, tE dhaanuk, raaTuk chOT hiin sangi dekkaDastta saadhun tersu raaTuk dekki vatta keran. saadhuk dekke raaT paarambariya ruuDhi dhaanuk huTi hibbi bheLi morgyaat senta bovi upachaar kerEs. raaTuk dekkastta ave saadhu raaT jovaL thevDa bhagavad viShayamun sangastta yattan keryaas. hoyeti raaT saadhu sangan ave viShyamuk parva kerliyeni.

saadhuk sonno, ruppo, vajjiru deguDaan, hariNu vaagu keTshaN meni bhove jEmun dii, teka lenkaal saadhu jovaLrhii aasirvaad khaLLuDuno meni gurikan hodes raaT.

apul raajyamu aisvaryamun bhori miLi cheDilEt rhino, jenulnu aski raaThoye mor jovaL bagi nhiistta kisti bhanduno meni aasirvaad kero meni saadhu jovaL magiliyes raaT.

“bhagavad viShayamun nokko aasi abbet phuro” menan raaTu manObhaavam attaakaalu menkyaan jovaL ami savvaay.

raaTuk aasin diye saadhu raaT jovaL oNTe praamakan melliyEs. saadhu prEv poDeyo visittiram hoye viShayamkan hode haal raajyasabhaam hode aski tenu aaccharyam poDyaas.

tisa kaayti meneyo saadhu ? “ elle kaammu mhoTTa mhuDaak oNTe teka dekkidheri teka kaam dE. teka haatum oNTe daNDu dii gaam asko chuTTu phiri aav mEn. tiyEs teko kaam kan rhino, teka haal tuu teko sombuLo deno.” ells saadhu praamakan melliyeyo. saadhu raaT jovaL meneyo askin bedirli aikilEt hodyaas vedur cheDi konnin vatto keryaani. raaT meLLi tisOs hOndak meni sammat keres. saadhu raajyasabho soDDi vichaarkan bharaaT aves.

saaDhu sange dhaanu raaT mandarin hEtu senta apul dEsum shEtte mhoTTa mhuDaak dekkidheri bolli avyaas. teno mhuDOs haa meni chokkaT janli phalcho teko kaam dii haatum oNTe daNDu dii gaam asko chuTTu phiri avasttEs tor kaam meni sangi dhaDDiyaas.

raaT tersu apul dEs chokkaT dhaanu sauNili aves. sonno, ruppo, vajjir deguDaan meni aisvaryamun cherches. nhanraNin bhove tenka horaaT kerliyes. bhove ravuLun bhandi bheLi sompukan dinnu gamTes. kaamuk thove mhuDo kaaikiso meni konni janlunaastta mhuDakan gaam chuTTu phirlEt hodes.

dinnun dhames raaTuk dovrappan avi lagEs. raaT moran jivan stithim ninjes. seNam moran avi laganjaas meni janli, ostun bandhun, mitrun aski tenka dekkastta prEv poDes raaT.

sejje dEsu raaTun mukyam hoye menkyaannu meni aski tenu moranuk poDriya raaTuk avi nicchu dekki vatta keryaas. tevaL oNTe dinnu raaTuk dekkastta mhuDo apul daNDu senta aves.

jhukkudi pharaatu raaTuk dekke sontum mhuDo “ sompukan jivo raja sompukan jivO” meni nandili gOSham tagili aves.  mor stithi janlunaastta ee mhuDo iso moko nandili avarEs naa elle mhuDo meni raaT jhukku vichaar poDes.

“mii jive kaalam mujjo, atto mii jaanjaariya kaalam auDriyo”. meni raaT mhuDo jovaL sanges.

“ kOT jaanjaariyo raja ? jiili khobbo avan ? meni mhuDo puses”

“jhuku duur jaanjaariyo. phiri avasttisa nhii ! meni raaT sanges”

«  tur senta moko meLLi bolli javo rajaa meni mhuDo sanges. »

«teeT aski toko senta sengukan bolli javaanaa. meni raaT menes”

“tisamenat mahaaraaNinuk koddi alagga bolli jaanjaariyo haa ? teka haaltis gaa moko avannokko menariyokii ? meni mhuDo puses. »

mhuDo kerariya vattaan aikkiti raaTuk raak aves. rhiyet meLLi shaantikerli mii mahaaraaNinuk  askitenka teeT bollijaan musunaa meni mhuDo jovaL raaT sangi dekkaDes.

« kaniShTha raaNik koddi bollijavogaa. meni mhuDo sanges»

« nhii nhii mii oNTe oNTikanuus jano. meni raaT menes »

« tisa menet mandirin aski tumin niLi jaastta kurcci chokkaT ghoDaa vaahano aido keri thovrhaan naa. thumre jovaL lhekka nhiistta ghoDaan shE naa. meni mhuDo menes. »

« addi raakkan raaT mharge mhuDaa ! ghoDaanuk aski mor senta bolli javaanaa !”

« hoo hoo serkas rajaanu tumi paada yaatre kan jaanjaaraan sonse ! vaaT peynaa hannav kan ruvva sonnaa kaasun, ruppaa kaasun aski khalli javo rajaanu. meni mhuDo sanguta.

mhuDaa vatto aikki aikki raaTuk addi addi raak aves. mor haal saansekkaarani vatta kerariya hibbirhavaaT meni mhuDaak sii raaT sanges. rhiyet meLLi saadhu sange haal toko kaamuk thovlriyo  itkadinnu tuu mhuDokan haatum daNDam khalli chuTTuphirli ave haal toko atto kaamunum rhii shaanti dEriyo. attenguT tuu gaam chuTTuphiri auno meni vEs nhii. toko tersu sombuLo denipoDai. hoyet ee daNDam tore sommar shrEShThu hoye oNTe mhuDaak dekki dheri teka jovaL tuu diiDuno. teko teka hoye sombuLo dEstta vaaT kerus meni mhuDo jovaL raaT sanges. »

mhoTTa mhuDaak dekkidheri daNDu teka jovaL dE meni raaT sanguto. tee mhuDo tye gheDimus apul daNDu raaT jovaL diyes. «  dhero rajaa khalluvo » meni raaTuk sii mhuDo menes. raaTuk abbedhaanuk raak avi kaay dhairiyam toko moko sii mhuDo menarastte haa !? » meni raaT gheDi vattaam puses.

mhuDo apul vattaa doni marchili «  haay rajaa, tumin mhoTTa mhuDo. aasta senta anubavince raajyamkin, keShTam poDi joDunjche hannavun angun prEv senta hovDe balun, ghoDaan, nhurun, prEvu bailunuk bolli javaanaa meni menaraas. hoyet kOT jaanjaariyo meni janlaraani. kOT jaariyo. kogo jaariyo kiso jaariyo, konka senta jaariyo, koga kurcchi jaariyo meni konni janlunaastta koTkii jaariya tore sommar mhoTTa mhuDo kOn rhaan ? horaaT kerliyaas, nhurun jenyaas, balun chevDiyaas, bhove raajjiyamunuk jigiyaas, kaas hannav joDunjchiyaas hoyet kaay pirjanam ?

mii kOn ? kago ujeyo ? kago dukkhu pondariyo ? jitravu guri kayo ? bhagavaan kOn ? bhagavaanuk kin amko kaay devalayi ? moran menat kaayo ? ujvaav moranuk tenguT shEstteyo kaayo ? iso konni janlunaastta kaLaLlunaastta elle lOkum jivi kaay phalan ? »

mhuDaa vattaan okkokkayo appuranji appuranji sokan hodes. mhuDo  kere okkokka vattaan raaTu monnum permaaT tagili bises.

daNDam haatum dherli gaam chuTTu phirlEt hode mhuDaak itka  gyaan haa ! raaTuk somsen phules tumi kOn meni pusta.

mii rhattadhaanu mhuDo nhaa jhuku orsu mullo tumko dekkastta ave saadhuk siShyo mii. serka hoye gheDim bhagavat viShayamun sangastta kurcchi mhuDo sokan hiNDeyo meni sanges.

doLo najjiye pharaatu surituk namaskaar kerariyo sokan.  apuluk moran lekta ave phalcho, jitravum shEtte rhatta handaarun raaTu kaLaan niLes.konni jannaastta isa virttaak kan jivayyo naa meni vichaar poDes raaT. rhiyet meLLi uraav shEtte dinnunum bhagavad dhyaanum buuD, naama sankiirtanam kEr meni raaTuk saadhu siShyo sangi dekkaDes.

itka dinnu mii oNTe mhoTTa mhuDa kan hodiras mor sokan konnin rhiiDunaango meni prajaanunuk raaT sangi dekkaDes. bhagavad dhyaan kerli naama sankiirttanam kerEs raaT.

ami ruvva haTvisiyeti avraam ami jhuku tenu bhagavad viShayam dheri janlunaastta kaas hannav joDunjchasttemaam ghoram kan rhiiDaraas. hoyet tii aski oNTe meLLo ami more phalcho avre haal khalli jaan musunaa. elle aski janli mhuDo sokan rhaanaastta bhagavad dhyaan, naama sankiirtanam keri unchaa istithik avno meni mellarEs.

||Bhagavad giita 07 :19 ||

bhahuunaam janmanaam antE kyaanavaan maam prapadyatE

vaasudEva sarvam iti sa mahaatmaa su durlabha.

Saurashtram

jhukku janmaantrun phallOs kyaanavaan mok prapadyuhOy

vaasudEvaske maam melli mahaatmaa ten su durlabhu.

kaliyugammu shEtte buddhisaali menkyaan bhagavad dhyaan naama sankiirtanam kerlEt rhaan meni bhaagavata puraaNamu 11.05.32 m sangiraas.